Subukan taya ing Kapampangan!

Anyang milabasan a banua atin kung dimdam a patalastas king istasyon ning RW 95.1 tungkol keng ligligan pamanyulat kanta a panimunan ning metung organisasyon a mikilagyung Aslag Kapampangan. Agad kung minta king istasyon ning radyo at mengutang. Dininan da kung papeles a nung nukarin la makasulat deng detalye ning ligligan.

Maligwa keng ayaring sinulat ing kanta ku, tono ampong letra. Ni-record ke keng kanakung MP3 Player at pepa-kopya ke king CD. Anyang akumpleto ku na la reng egana-gana kailangan, maligwa kung minta Hilaga (dating Paskuhan Village) a nung nukarin la papalub deng kantang yayabe keng ligligan. Alang tao keng opisina ning Aslag Kapampangan anya keng opisina na namu ning Hilaga karin ke likwan ing kanakung kanta.

Anyang linwal na la reng resulta, eku man rugu miyabe. Oneng enaku man melungkot, uling sane na ku man masasambut, hehe… Pero masaya ku pa rin uling mekasulat kung kantang Kapampangan. Keng kerakalan da na reng asulat kung kanta, ya mu kabud ing Kapampangan kung kanta iti. Angga man ngening kasalukuyan.

Ing kanta, Nokarin Ta Kanyan?, makapatungkol ya king pamanyambut nang Among Ed bilang Gobernador na ning Pampanga at kareng kayang taga-suporta. Tutu pin na masanting yang kaganapan para kareng Kapampangan ing pamanyambut nang Among Ed, pero ing kutang, ustu na wari ita? Kaybat tayang nilukluk, malyari ta neng lakwan at manenaya tamung salese nya kabud ing balen a Kapampangan?

Ena man makanita, ali wari? Ngening atyu ne i Among Ed, bista man sigurong metung yang mayap a tao at alagad ning Diyos, ene agyung bayuan ing buong balen ‘yang dili na. Epa yari ing obra, ara pin, bagkus magumpisa pa! Ngeni, kabang makalukluk ya i Among Ed… kabang masala pa… lalo pin dapat magobra! Makibalu ampong makyalam… magmasabal! Ena pa oras ning pamagpayniwa.

Anya pin ing kutang ku… nanu nang tutuki? Nokarin ta kanyan?

Ayni pu ing liriko o letra na ning kantang sinulat ku…

NOKARIN TA KANYAN?

REFRAIN:
Nokarin ta kanyan?
‘Yan ing kakung kutang
Sinlag ne pin ing abak
Nanu nang tutuki tamung gawan?

Pabusten ta nang makanyan?
Kaybat na ning inumpisan
Kabud ta na munta king lele
At karin ta na manalbe

(ulitan ya ing Refrain)

E wari dapat ta ping makyabe?
Nung talagang buri tamung salese
Dapat tamung gawan kekatang parte
Sukat tamung ‘bye kekatamung dake

(ulitan ya ing Refrain)

Ngeni pin kabang masala
Magobra ta na ngan balang sabla
Pamagbayung kekatang inumpisan
Ituloy taya’t diyan kaganapan

(ulitan ya ing Refrain makatadwa)

Nokarin ta kanyan?….

————————————–

Roy
August 9, 2007
Angeles City

***PAGANAKA**** Irespeto taya pu sana ing karampatan at kapindyan keng misulat a kanta. Libre kayo pung kopyan ing kanta, pero sana eye pu kakalingwan isulat nung nukarin ya menibat. Dakal pung salamat.

This entry was posted on Tuesday, June 17th, 2008 at 8:50 am and is filed under Balita at pakilala, Kanta o tula, Roy.You can follow any responses to this entry through the RSS 2.0 feed.You can leave a response, or trackback from your own site.