Subukan taya ing Kapampangan!

 
Anyang April 16, 2008, mipakirut ya ing buong Pampanga… ali mu pala, nune ing buong Pilipinas, king pangamate na ning awsan dang Sisig Queen - i Aling Lucing. Atyu ku keti Angeles, pero abalu ke mu ita kareng news flash a papalage da ding TV, anya pin talagang mebigla ku. Makanita ya karagul ing balitang ita, miras ya agad kareng istasyon ning TV keng Manila. Ampong karen pang tutuking aldo, papakit de pane king balita, ampo nung nanu nang mangapalyari king imbestigasyon da.

Ngeni, ing pagtakan ku mu, balamu yata menahimik ne ing kaso. Ing tatauling balitang dimdam ku yapin itang sasadya da ne ing warrant of arrest para keng asawa nang Aling Lucing at mapilan mung aldo kaybat ning libing, dakpan da ne ing matwa.

Kalupa da ku naman pu reng kerakalan kekatamu na e balu nanu talagang milyari. Pero mipakayli ku anyang mumuna dang ibalita na ing asawa na yapin ing mumunang diling suspect keng pangamate nang Aling Lucing. Keng lawe ku mu kasi, mipasobra la yata keng pamanalbe dang TV dening imbestigador ning kaso, at makyapos na la mu kareng akakit da. Pero sabi ku pin, eta balu nanu naman talagang milyari.

Anyang mumuna, ali na ne man tuturu nitang abe dang bale. Pero anyang bandang tauli yata beligtaran na ne kanu. E malaut siguro ita, kasi ilang atlu atsu king bale, at siyempre ba yang misalba siguro, unahan na ne ing matwa. Siguro pu ne? Eta pin balu. Ngeni kanu, ala ne mu naman itang abe dang bale ita, limbug nya naman kanu.

Dakal pung kuru-kurung dudurut keng milyari. At dakal la pa pong aliwang sasabyan deng miyayaliwang tao. Balang metung atin kanya-kanyang opinyon at kapaniwalan ana pin. Atin pung maniwala na wapin ing asawa na ing mekamate, at dakal la naman deng atin pang tuturung aliwa.

Ngeni pu, ala na lang papalto balita keng TV tungkol keng nanu nang milyari king imbestigasyon. Malagad ku mu naman makiramdam radyo, anya eku balu nung babalita de karin. Maragul ya pung epekto ing milyari keng kabalenan ning Angeles. Sana pu, nung ninuman ing talagang ginawa keng krimen arakap de, at eno man sana mipaparusan detang alang kasalanan.

This entry was posted on Saturday, June 21st, 2008 at 3:29 am and is filed under Ala mu, Opinyon ampong pakiramdam, Roy.You can follow any responses to this entry through the RSS 2.0 feed.You can leave a response, or trackback from your own site.