Subukan taya ing Kapampangan!

Anyang tsa-P7.50 ya pa ing pamasahe, ing bayad da reng anak ampong mangatua tsa P6.00. Kaybat mika-probationary decrease anyang milabasang banwa at meging yang P7.00 mu ing pamasahe - pero ing kareng estudyante ampong matua menatili yang P6.00. Ngening banua mibalik yang P7.50 ing pamasahe, at makanita mu rin… P6.00 ya pa rin ing ating diskwentong pasahe da.

Ngeni pin, tsa-P8.00 na ing pasahe. Nung kwentan me ing dapat dang diskwento reng magaral ampong matua, P1.60 ya dapat ing mabawas king pasahe da, bente porsyento (20%) na ning walong pesos. Anya pin dapat ing pamasahe da, P6.40 ya mu. Pero uling ikatang Pilipino, medyo miki-kayabangan tamu, eta na bisang gagamit kareng tsa-diyes ampong tsa-singko, mebilog yang P6.50 ing pamasahe da. Ala namang kaso ita, ditak mu naman diperensysa.

Pero bakit deng aliwa, at kerakalan - imbes na P6.50, tsa-P7.00 ing sisingilan da kareng anak?! Opu! Makapagtaka pin pu ita. Mekatapilan ke kitnangan ing anak kung magaral king Pandan nung magkano ing babayad na, at talagang P7.00 pin kanu! Ela ba biyasang manguwenta o talagang panyamantalanan da la reng magaral a anak?

Lawen mu la reng saken ngeni, alang makakabit nung magkano ing pamasahe da reng magaral. E na kalupa kanita, masala yang mapaskel na P6.00 ya ing pamasahe. Ali de talaga kakabit, uling ing mandato na ning LTFRB, P6.50 ya! Oneng uling ping mas mal ing buri dang isingil, ala lang kakabit. E da ne man akabit ing P7.00 uling ali ya ustu! Basta manyingil lang matas, deng anak rugu ala lang akarapat!

Balu na kaya ning gobyerno ta iti? Kanino la dapat ipabalu reni? Atin bang mikimasabal? Ikata-ikatamu na mu, mipapanlamang ta pa! Kaybat buri da reng mamasadang aren irespeto mu la. Kerakalan pa karen asno kaselan, sumabi kang bagya maybug da kang laklakan!

Patse kayabe da ku reng anak ku, pamayad ku lang buo - P8.00. Mananu ne wari itang ditak a diperensya, ala namung kasu ita. Pero itang eku buri talaga, itang pamaglokoan da la reng anak! Nung makanyan la reng mangatwa, nanung abalu dang ustu reng anak?! Aliwa ing singkwenta sentimos ing pisasabian keni, nune nung nanu ing dapat… nung nanu ing ustu.

Sana ating magmasabal kareng dapat magmasabal… atin la sanang gawan.

This entry was posted on Monday, June 23rd, 2008 at 8:47 am and is filed under Opinyon ampong pakiramdam, Roy.You can follow any responses to this entry through the RSS 2.0 feed.You can leave a response, or trackback from your own site.