Subukan taya ing Kapampangan!

Kalambat ku palang mulala, antimong tupang mawawala
Pilit keng kakaulan, ing dila da reng banyaga
Kanta, tula ampong sanese, keng english ko tatalete
Na ku pa mo kapagmaragul, ing batal ku eme abakle

Minsan a aldo, anti ku mong mitakid… misubub
Bala mo migising king malambat a pangatudtud
Kantang Kapampangan, kakung apakiramdaman
Poesia ampong sanese, mekapamasa ku naman

Kasanting da palang babasan, kanyaman dang pakiramdaman
Anti mong pamangan a tiktak yumu, pero e makasabal man
Ing amanung sisuan, tutu yang makagiyam
Mengari ka mong bingut, yuyuyu ra king duyan

Anya pin inisip kung subukan, ta’t mo ali?
Kapampangan ku pa rin, yan ing mumunang dili!
Ing Amanung Sisuan, kanaku yang gamitan,
Kareng kakung susulat, ipasyag k’ya naman

Dapot minisip ku’t mikakunu naman
Pota mipakarine ku, maging pikatulan
Lunto kung magsasa, trying hard ing datang
Uling ing Kapampangan ku, medyo mababo la naman

Mikakunu ku man, masikan na ku pa rin agutan
Mengari mong ket lamok, ne nyaman gamusan
Ipasyag ku ing kanaku, adyang mababo Kapampangan
Siguro keng kelambatan, mabyasa ku naman

Ngeni e na ku mulala, e na ku malilili
Keng sariling bale, antimong mekauli
Ing sarili kung salita, kanaku neng gagamitan
Yapin ing Kapampangan, ing Amanu kung sisuan

——————————
Roy
June 24, 2008
9:00 AM
Angeles City
Philippines

This entry was posted on Monday, June 30th, 2008 at 8:31 am and is filed under Kanta o tula, Opinyon ampong pakiramdam, Roy.You can follow any responses to this entry through the RSS 2.0 feed.You can leave a response, or trackback from your own site.