Jun
30
2008
Lu-a Keng Kakung Mata
Posted by: Roy in Ala mu, Kalokoan o biro, Kanta o tula, Roy, tags: cry, eyes, kapampangan, lua, mata, pisngi, poem, poesia, poet, tears, tulaManibat meko ka, ena tinuknan
Patak na ning lu-a ku, antimo ning uran
Dapot adyang emu siguro sasaryan
Kalalaki kung tao, ikwa mu kung apagagan
Nanu pa naman wari ing buri mung gawan ku?
Ing magmakalunus at siklaud king arap mu?
Kulang na mung daya ing kanakung igaga
Ginulut ka pa rin, kaybat mebating kang bigla
Ngening aku nang dili, ampong magmuni-muni
Magparugu-rugu’t malulunus king sarili
Anti la mong misa-saglulu, lu-a ku keng pisngi
Alang metung kaladwa, kanaku makidalamhati
Ala pa ring patna patak na ning kakung lu-a
Eku na pinigil o kiskusan bitasa
Pilan mung penandit, enaku manakit bina
Ing lu-a ku pala, melangi na’t meging nang muta
—————————–
Roy
June 24, 2008
11:35 AM
Angeles City
Philippines
Entries (RSS)
Kagaling na Abe nining kawatasan mo, papakit ne ing kapusungan Kapampangan! Palungkutan naka kaybat patulan nakang bigla. Masanting ya ing blog mu. Akakit mi ing kababan lub at katutuan. Kareng mamarusa karing magsalitang Kapampangan eskwela ken, palage ku sukat mong pakisabyan ding mestra ampon principal. Dakal a paralan ba lang mitayis karing amanu ding anak at tau. Ing pamamarusa ali ya abe karening paralan areni. Ing parusa metung yang paralan makamate king kegiwan mangamanu at pamaglalang (creativity). Subali pa karetang bage pan batas. Bored la siguru ding mestra at anak, alang agawa anya gagawang gimmick. Bakit edala abe ngan ding anak mamoesya, mangulis, gawang dalit o kanta, mag-drama. Lumwal king silid pipagaralan, talanga banwa, pagumasdan la ding biga (saka ranala uryan cumulus, nimbus, alp.), sipatan la detang acacia, lawen la nung aula dala twa, munta king Pisamban lon nung nula mipakat karing ebun ding batu na ketang telakad de anyang panaun ning Kastila.
Salamat Kabalen.