Mayap a aldo! Nanu pung asaup ku?
Posted by: Roy in Ala mu, Opinyon ampong pakiramdam, Roy, kayausan o uso, tags: abak, akasanayan, aldo, amanu, aus, banko, business, empleyado, english, gatpanapun, good morning, gwardiya, hapon, kapampangan, language, mall, mamaus, mayap, negosyo, opisina, phone call, sisuan, telepono, tinderaPangarakalan, patse minaus ka telepono kareng opisina o nanu mang tindahan o negosyo keti Angeles, ing pakibat da keka - “Good morning! How may I help you?” Dakal la pa kayabe yan, ana nang sabyan ne pa ing lagyu ning kumpanya da, sabyan ne ing lagyu ning makibat, pasamalat ya keng pamanaus mu, ampo nung nanu-nanu pa. Miyayaliwa la istayl balang opisina ana pin.
Pero nanu man ing karelang pang-amanuan o sabyan dang miyayaliwa kareng karelang pakibat, sigurado mung English ya ing karelang salita. Pauli na ning mimulat kekatamu na ing English yapin ing ‘universal language’ at iya naman kanu ing ‘language of business’. Anya pin king pamakirungut kareng taong kanegosyo tamu, kliyente ya man o adyang ing kapakobra mu mu, lalu na nung amo me… aru! singkasiyas dila king pamag-English. Uling istung mag-English ka, propesyonal ka datang.
Tabalu, o’t ngeni ku mu a-isip… o’t eta asanayan ing makisabing Kapampangan kareng ka-meeting tamu keng negosyo. Pati pamamakibat telepono, pilmis ya mu itang ‘good morning’ ‘good afternoon’, adyang deng gwardiya kareng mall o bangko, saganan da ka naman - “good morning sir, good morning mam” o kaya “good afteroon sir, good afternoon mam”. Pati reng magtinda kareng mall, waiter, deng keng opisina… patentado ya! “Good morning!” o “Good afternoon!” Ot eta kaya subukan? imbes na “Good morning” ing sabyan tamu - “Mayap a abak pu!” o kaya “Mayap a gatpanapun pu!” e ya mas masanting pakiramdaman ita?
Pakibat da siguro reng aliwa, “E na man kasi egana-ganang magobra atyu keti Kapampangan la e, ampong ali egana-ganang akakasabi mi aintindian da ing Kapampangan” Ing pakibat ku naman, “E no man Amerkano ren, oba’t makapag-English la! E di ituru yu la! Atyu la Angeles e, Kapampangan ing amanu keti. Ampo sigurado kang egana-ganang kasabi mu aintindian da ing English?” Kapilosopoan ng Roy ada siguro reng aliwa, pero yapin pu ita ing tutu. Lungub ka kareng Japanese restaurant, saganan da kang ‘moshi-moshi’, eno man Hapon deta! Filipino la naman e! Ing punto ku, nung deng aliwa-liwang lenguwahe agyu talang panigaralan… o’t ing sarili tang Amanung Sisuan e ta ya pwedeng iharap?
Ini na ing panaun ning Amanung Kapampangan… pagmaragul taya ampong gamitan. Sana akasanayan taya… para akasanayan taya, kailangan umpisan taya. Kaswelo ku sigurung makaramdam nung ing sagana na kanaku ning awsan ku king telepono… “Mayap a aldo! Nanu pung asaup ku?”
Entries (RSS)
Abe Roy,
subukan mung munta palengke San Nicolas, ing sagana da keka deng magtinda, nung lalake ka, “koya nanung keka?” o “koya nanu ita?” Keng palengke San Nicolas, kapampangan la deng magtinda. Subukan mung magbanda king Freeway, damdaman mo ding magtindang asan danum, kakanta da ing tinda ra. Pero malagad na la mu deng magtindang magkanta. Kanitang 1960’s dakal la pa, lalu na palengke Guagua.
Bilicoopscoopi
Dakal pung salamat keng pamag-bisita king blog. Wapin pala, den keng palengke Kapampangan pa mu rin sasagana da.
Sana mu pin pati reng kareng mall, akasanayan da ne?
Dakal pung salamat pasibabayu.