Deng sikat a Kapampangan!
Posted by: Roy in Ala mu, Opinyon ampong pakiramdam, Roy, tags: among ed, angeles city, coach, Filipino, kapampangan, Mon David, pampanga, PBA, Philippines, pride, Professor, Randy David, sikat, Starstruck, Yeng Guiao
Nabengi, kabang mamapun kami reng anak kitnangan na ku ning metung kung anak a lalaki, “De, atin bang sikat a Kapampangan? Itang kilala keng buong Pilipinas?”
“Natural atin!” nga kung mekibat, “karakal da!” Saka ku mimisip nung ninu ngan reng sikat a Kapampangan.
Mumunang linub dili king utak ku i Mon David, metung yang singer-songwriter-arranger. Wapin ‘ya ing vocal coach ampong arranger da reng APO Hiking Society, ampong original member ning AngFourgetables.
Kakadwa sinabi ku i Prof. Randy David, metung yang kolumnista among commentator mu naman keng TV. Oneng ali re masyadong kilala, uling ali de pa ayayalben. Kapatad neng Among Ambo, i Monsignor.
E di minisip ku pa ninung sikat a kakilala da reng anak… a i Lito Lapid, taga-Porac ya yan! I Yeng Guiao, bayu ya meging kalaban nang Among Ed, metung yang magaling a coach keng PBA.
I Ninoy Aquino, taga-Tarlac ya di ba?
Kasalukuyan ku pang mimisip nung ninu la pa reng sikat a Kapampangan, oneng artista la ngan halos deng a-i-isip ku kalupa nang Joey Marquez, Sheena Halili, Melanie Marquez, Nanette Inventor, Aljur Abrenica ampong aliwa.
Mimisip ku sanang aliwa pa a ali naman artista, a talagang apagmaragul tamung Kapampangan… kabira-bira, kapapakibat ning pangane ku, “I Gloria, e wari kapampangan ya?”
“Talaga?!” nga na nitang minunang anak a mengutang.
“Wa,” aku naman mekibat, “taga-Lubao ya… istu na yan, mangan ta na!” kanakung sinabi a balamu milako na ku gana keng pisasabyan.
P.S. balikan ke pa ing topic a ini, mag-research ku pang marakal tungkol kareng kekatamung Kabalen a talagang apagmaragul tamu.
Nung aburi meng binasa ini, o't e ka mo mag-subscribe king Email ba kang agad mipabaluan patse ating bayung mipaskil
Entries (RSS)
ay, wa. MARAGUL ing pami-aliwa da deng sikat ampong deng apagmaragul mung sikat a kapampangan.
kaya pin sana, sumikat na la deng kapampangan bilang kapampangan.
ikwa me ing buri kung sabyan abe!
Jose Abad Santos ing bayaning beril da reng Japon kanitang World War II, taga San Fernando, Pampanga ya. Lawen ye keni: http://www-rcf.usc.edu/~camiling/bio/jsantos.htm
Rufino Jiao Cardinal Santos ing mumunang Cardinal ning Pilipinas. Taga Guagua ya.
Lea Salonga, kapampangan ya ing tatang na. 6 years ya keng Angeles bayu ya linipat Manila.
Efren “Bata” Reyes, sikat yang mag billiard keng buong mundo a awsan dang “The Magician”. Taga pampanga ya. (Tegawan ne ning pangane ku ing asawa na).
Diosdado Macapagal ing 9th President ning Pilipinas, taga Lubao Pampanga ya.
Dakal pang sikat kapampangan. Lawen yula keni: http://pam.wikipedia.org/wiki/Kapampangan_(lahi)