Mali ya ba ing gewa ko?
Posted by: Roy in Opinyon ampong pakiramdam, Roy, tags: ala lu, angeles city, barangay, dapog, kapitan, marisol, neighbor, sigalot, siping-bale, tanod
Nandin abak, maranun pa mu mamau na kaming asok king bale. Lulub na king kilub ning bale mi ing makapal a asok a manibatan king siping bale. Halos aldo-aldo gagawan da ita, ing magdapog. Neng kayi pabustan ku na la mu, tutal ala na lu man ding anak ampong e na man makanita karakal.
Pero nandin, masyado makapal! E na ku makapangisnawa ampong halos mangapalua na ku mata king sakit. Kakadwa na pa nita, atyu la ring anak at asasagap da ngan ing asok!
Linwal ku bale at pintalan ke ing siping bale mi. Ngeni ku la pa pintalan. Sinabi kung lulub na king bale mi ing asok na ampong e na ku makapangisnawa. Agad na ne mang pitda, oneng e naman kabud mu makanita meyari - “Ba’t galit ka yata?” ngana kanaku.
Kailangan na pa bang kutang ita? Kasakit ku na panamdaman. Buri na pang palto, na aku ing mali. Pwede ku naman kanu sabyan masalese. E ku gugulisak, e ku managkas. Medyo masyas ku pamanyalita uling talagang mimwa ku! Mimwa ku uling masakit ku panamdaman ampong pigaganakan ko reng anak ku.
E pa yari, king tutuki kano sabyan kung masalese. E la Kapampangan reni. E ku balu nung nokarin ya menibatan ing kasabi pero sigurado kung ali ya Kapampangan. Kakadwa na nita, dakal lang bulugan a makatuknan ketang karela, kekami, aku mu ampong reng atlu kung anak.
E ku ne petulan pa tutal pitda na ne ing dapog. Pero e ku buri ing panamdaman ku uling aku pang lulto matsura gewa.
Keng tutuki siguro, dapat lumapit na kung tambing keng barangay captain. E ku mu balu nung ninung kapitan kening Marisol. Deng tanod naman keni akakit ku la mu patse manyingil lang mete.
Susulat ku ne mu rin keni ini, ban kanita nung sakali, nanu mang malyari, atin mikibalu.
Nung aburi meng binasa ini, o't e ka mo mag-subscribe king Email ba kang agad mipabaluan patse ating bayung mipaskil
Entries (RSS)
istu ka na atin muring mali na….
…o yan talaga ing masakit keng makisiping bale kekatamung kapampangan, gang pang talagang masakit keng lub mu, at aliwa ika ing makikasalanan, ika pa ing manikalaud at magpasensya, ita ing ugali anya talagang apansinan mung maging kapampangan ka at ila ali la…
minsan ing pali ning buntuk saugli alabas at mibuwa, o neng nung salubungan me ing pali keng mapali mas maragul ing silab,
makipate ka man kaya at makidiskusyun kang makaba, ya naman ing kapupuntalan na nita. eko mikasundo uling keugalyan na na ita, at malyaring gawan na pa, pota pang relief ng stress neng abak ita, dalan mu keng marimla at masalese pisasabyan, kaybat nung e tinupad, kapitan ne ing papanalakaran, balu ku maragul yang barangay ing marisol nya talagang eme kakilala.
ana pin deng aliwang mangatwa sasabyan da, alang taung perpekto, ita mu ngan atin mali,
aku ing panwala ku, perpekto tamu,
perpektu tamu keng pamanggawang e-perpekto…
gyang makapanandaman kareng aliwa, gawan tamu, etamu isipan ing damdaman da reng aliwa, pero pag kinablas masakit lalo mimwa ta pa.
balamu ikit kiya naman ing sarili ku keka keng gewa mu, same case scenario, keta keng Capaya 2, AC… nung enaku pekisabyan ning katwangan ku, mikaras kami, uling ing kanaku bingut ya pa ing pangane ku, at emu asuk a lulub uling makadikit ya ing CR da keng pader ning bale mi, aliwang klaseng asuk nune asuk marijuana… anya tanod no reng inawus ku.. at minsan asarilinan ke.. sibyanan ke nung emu keng katwangan ku apate daka aku kaya… mibayit ku keng lugar a kaswal mu ing makipate at balbalan buntuk, a balamu tondo…anya magumpisa na nita ene meg marijuana… at meging close kami… at mebyasa kung meging cool lalo keng pamagsalita…uling talakapali ku buntuk… maski miras ku keni dubai.. a kontrol ku na ing paling buntuk a yan…
pakakalale abe, ditak a pangadi, dalan ta keng masaleseng pisasabyan ana pin.
dakal a salamat Philip. minsan talaga e ku a-iwasan ing pumali buntuk lalu na istung apektado la reng anak ku.
ayntindyan daka kapatad pero pilan kunang beses asubukan na ing paling buntuk mumuli keng gulu,tutu,makabusit ing kaleleng bale a alang panatindi pero ikana din ing sinabi pete ne kagad buri ng sabyan anggang makananu atin yang pamakyabe,keng pasibayu kapatad emu pairalan ing paling buntuk at ala kang kapuntalan nune gulu lalu na ikayu mu reng anak mu ken,pangadwa kasiping meng bale iyan,ada pin mas mabilis lang adwananang sawup ing kalele bale kesa keng malawut a kamag anak
ano ibig sabihin ng masalese?
Roy ala kung akakit kamalyan mu karin, natural mung mimwa ka kasi emu misan gagawan da ita, ela biyasang manatindi, pero ustu kasing etala ka level deng aliwang tawu at mas malawak tamu pang unawa itana ing magpasensiya, diplomasya ing kailangan lalu na kareng siping tamung bale. Nung ela man kapampangan para kanaku mas tamung dapat ipakit itang biyasa umunawa at magpasensiya. Mibayu la ren siguradu ku potang a realized da na mali la pala.
Milabas na ing muwa mu, pwede mong lapitan sabyan mu anya mimwa ka kasi makapal ing usuk at deng anak asisingap da ing asuk, pero ala na kaku ita at sana ena malyari ita (hehe) balamu ata tatang ku datang Roy.
Keni kekami, manyilab kami ring sukal keng mula, pero papabalu mi lalu na ustung atin makasable malan. Okey mu nung ditak ditak mu at ing hangin e masyadung lulub kareng siping bale, anya mipapanatindi kami, ustung ing hangin malakas at lulub kareng kasiping etamu pamu manyilab, o kaya dala da keng alang maka perwisyo.
Thank you roy keng pamag post mu, atin mu rin kapulutan aral ining kekang “Mali ya ba ing gewa ko?”
Ayntindyan ku ing panamdaman mu keng siping mung bale. Minsan ali mu aiwasan ing mikapali buntuk pero tutu pin na kailangan kang magtimpi para ali na dagul ing gulu. Atin ku rin kasiping bale kening Brgy. Claro, mas grabi ya pa keng siping mung bale… pero ali kune kuwentu, sakit naku mu lub.
Sir Roy palage ko naman po ali daka asisi uling patse ing pisasabyan reng anak.. talang kailangan paglaban. Nina noman kaninita dapat mimisip larin aliwa mo ila.
nuko ne. dakal pung makanyan a kasiping bale lalu na retang e likas kapampangan. enakuman keng mag discriminate pero reng kerakalan na makanyn pamanugali retang e kapampangan. makalungkut.
enaka man mali karin, aydana nung aku keka pe barangay kune yan, o kaya sali kang apulung bentilador potang balu munang magdapug ya, sindian mong sabe sabe tutuk mo karela,..
ing tutu na nyan, mag kaswelu kung mamasa kareng susulat mung kwentu, kasi maka sabe kareng matwa o malalam a kapampangan, neng kayi kabud naku mayli keni, balada reng katubale ku keni memurit naku.. o sige salamat kareng kwentu mu maski ditak sasaya kung mamasa.